El Canal Grando (par i venesiani anca Canałaso) el xé el prinsipal canal de Venesia. Łóngo sirca 3800 metri (łarghesa dai 30 ai 70 m, profondità media 5 m), el divide en dó parte el séntro stòrego trasando na "S" roversada che ła va dal'entrada del Ponte de ła Libartà al Basin de San Marco.
El xé fiancà par tuta ła łonghesa da maravegióxi edifisi, en gran parte dei sècołi fra el XII e el XVIII, chei mostra el benèser e l'arte creai da ła Repùblica de Venesia, faxéndoło un dei sìnbołi de ła sità. Ogni an i venesiani i ghe revive tradision secołare de ła Serenìsima come ła Regada Stòrega.
Dópo un corto tóco en diresion sud-est, al'altesa del Pónte de ła Costitusion el gira a nord-est par descrivar na granda ansa łóngo ła qual se cata el Pónte dei Scalsi e ła confluensa del Canal de Canaregio, e che ła finise al Pónte de Rialto, l'unego antigo frai pónti e famóxo come el canal steso. Da qui el va vanti verso sud-ovest e dópo a sud (dópo ła "volta de Canal") e infin a est dal Pónte del'Academia a ła Punta de ła Dogana. En sto percorso qua el toca sinque dei sie sestièri, el toe 45 rii minori e el xé suparà da sete pónti (quatro pedonałi, dó automobiłìstisi e un feroviaro). El più resente el xé el Ponte de ła Costitusion, progetà dal'architeto Santiago Calatrava par cołegar el piasal de ła Stasion de Venesia Santa Lusia co Piasal Roma, caołìnea de łe lìne automoblìstiche del'Azienda Consorzio Trasporti Venezia. Ła data de inaugurasion al tràfego del quarto pónte, el nome definitivo del qual nol xé ancó stà dato, ła xé ancó inserta a càuxa del łento 'ndar vanti dei łavóri de giustamento.
Шаблон:Quote |
Fiume intorno al qual ła sità ła xé nasua, séntro vidal dei comersi de ła Serenìsima par tuto el Medioevo, el Canal Grando el xé stà ła sede più anbia dei pałasi de rapresentansa de łe famége patrisie, el łógo dove mostrar ła propia richésa, «el vèro Libro d’oro» 'ntel qual distìnguarse.
I xé almanco 170 łe rexidense che anca deso łe poe contar un megiaro de ani de splendor de ła Repùblica, 'nte ła storia de łe famége che łe ga visuo e 'ntel vicendarse de łe architeture, sénpre influensae da un gusto particołar venesiano. Se poe dir che co sta "gara" qua al pałaso più beło Venesia ła gabia dato corpo 'ntel Canal Grando al'orgogio de ła propia identidà e al profóndo łegame co ła laguna. A ste qua se xónta qualche céxe, scółe e canpi; póche łe fondamente par costegiarlo a pie.
en un dipinto de Canaletto.]]
Шаблон:Quote |
Squaxi tute łe abitasion łe salta fora diretamente dal canal, sensa marsapié: soło navegando se pue contemplar sensa interusion sto seren seguirse de pałasi łumenai dai riflesi del'aqua, ixołai dai fiumi de xénte e speso "serai drénto" da variopinte brìcołe par l'atraco. El Canal Grando el da cusì un anbiente incantà, componente esensial de ła magìa che ła ga fato Venesia na de łe sità più amae al móndo.