Ła Ponta de ła Dogana o Ponta de ła Sałute o Ponta da Màr xe na xona de Venesia, sutìl ponta triangołar de divixión infra el Canal Grando e 'l Canal de ła Zueca, davanti el Basin de San Marco.
Ła xona ospita tre inportanti conplesi architetoneghi: ła Baxełega de Santa Maria de ła Sałute, el semenario patriarcal e 'l conpleso de ła Dogana da Mar da dove l'area ciapa 'l nome.
Par saverghene de pì, varda ła pajina Baxełega de Santa Maria de ła Sałute. |
L'edificio sìesentesco, òpara del Benoni, xe a pianta triangołar, costituìo da 8 canpàe sviłupàe su do piani e xe coronà da 'na tore sorastàda da ła Bała d'Oro, sfera in brónxo dorà sostegnùa da do atlanti a rafeguràr el mondo su cui puxa ła statua dita "Occasio". Tal statua raprexenta ła Fortuna, òpara de'l scultór Bernardo Falconi, rodante ad indicar ła diresión del vento e, sinbołicamente, ła mutevołesa de ła fortuna stesa.
Ai tenpi de ła Republica de Venesia el conpleso, par la so poxisión sentral intra 'l Basin de San Marco e l'inboco del Canal Grando e del Canal de ła Zueca, vegniva utiłixà cofà sede doganal par łe marcansìe e i beni ogeto del comercio naval.
Inportanti laóri de restàuro ga consentìo 'ntel 2009 ła reałixasión a l'interno del conpleso de ła Dogana da mar de un sentro d'arte contenporanea cołegà a Pałaso Grassi, progetà da l'architeto minimałista giaponéxe Tadao Ando, coadiuvà da un pool de profesionìsti itałiani, su comisión del magnate de ła vóga fransexe François Pinault, proprietario de Pałaso Grassi e cołesionista d'arte contenporanea. L'edificio gà subìo un consołidamento statico e xe stàe reałixàe anca łe òpare necesarie ała so protesión da łe aque alte ed ała so fruibiłità da parte de persone e ridota capasità motoria: xe stài istałài inpianti mecanici ed ełetrici pianixài ała conservasión e ała protesión de łe òpare d'arte che ghe xe mostràe.
Ła firma de l'architeto giaponéxe xe raprexentàda da alcune paréde in betón a vista, tipeghe de ła so òpara, che xe servìe in parte par mascarar i paraménti tecnołogici necesari ad un moderno centro expositivo, ed in parte par reałixar, propio al centro de l'edificio, un local grando quadrà. El progeto sul prinsipio prevedeva anca ła reałixasión, in Canpo de ła Sałute, de 'na cubia de cołone de semento a sesión quadràda; ła propòsta dopo alcune połemiche, xe stàda sbandonàda a cauxa de łe numeroxe łinee dei sotoservisi prexenti in queła xona.